Hawaasa, Woxawaajje 05, 2018 (SBC) Qoqqowoho 2018 B.dirira qaaqquullu, amuwu, qacalenna wedellu fayyimmanna sagalete amuraatinni woyyaawino gumi borreessaminoha ikkasi Sidaamu Qoqqowi Fayyimmate Biiro Sooreette Dr. Selaamaawit Mangashiti xawissino.

Biirote Qaaqquullu, Amuwu, Qacalenna Wedellu Fayyimmanna Sagalete Amuraati Handaari 2018 B.D loosu gumulshi keeno ha'rinsoonni.

Battalate Biirote Sooreette Dr. Selaamaawit Mangashiti xawissino garinni sa'u sase dirrara fayyimmate amuraate ijaarate Kalqete Fayyimmate Uurrinsha wortanno lee heelliichuwa kaima assi'ne hananfoonni loosi guma borreessisanni dayno yitino.

Amuwu fayyimmate uurrinshuwara ilanno gede balaxe godowii noo amuwa badate loosi, amuwu fooreme kaajjisha, amuuwu keeshshannowa 44ho noo wiinnio 135, uurrinshuwate ilanno amuwi xibbunni 69te noowiinni 93% iillinshoonni yitino.

Fayyimmate uurrinshuwa dagoomu halammenni haaroonsinoonnita, kittiwaate tuqishshinna horoonshi lexxinota kulte, bisunna tiiunni fayyo ikkitino wedella kalaqate hananfoonni looso wedella fooreme halammenni loonseemmo yite qacalimmate yannara kalaqantanno godawa, gargarate, tii"insa jawaatino wedella assate loosi xaano illacha hasi'rannota kayissino.

Biirote Layinki Sooreessinna Fayyimmate Purograamma Qineessaanchi Kalaa Belayne Beqqelehu isi widoonni xibbunni 80 anga dagooma hanqafino konni handaarira owaantete silanchimma ledatenna fayyimmate uurrinshuwa ikkadimma aana loonseenna danchu gumi borreessamino yiino.

Uurrinshuwate, woraddatenna zoonnate 0 jeefishshu babbaxxi bikkinni dagoomu horonsi'raanchimmano babbaxxasenni konne tahashshate keenote battala ikkase kulino.

Yisihaaq Fiqiru